Lardizabal eskola

MUGIMENDU AUTONOMOA , GELAN ANBIENTEEN ANTOLAKETA, EKOSISTEMAK

Anbienteak ingurune estimulatzaileak dira, non haurrak askatasunez mugitu, aukeratu eta modu naturalean garatu daitezkeen, beren interes eta motibazioen arabera. Aniztasuna errespetatzen duten espazioak dira, haur bakoitzaren erritmo indibiduala uneoro kontuan hartzen dutenak.

Irakasle behatzaile aktiboa da. Jakina, koordinatu egiten du eta estimulua da haurrarentzat; baina haurrak dira benetako protagonistak materialekin elkarreraginean daudenean, espazioetan zirkulatzen dutenean eta jarduerak egiten dituztenean.

Helduek espazioak behatu, berregituratu eta zaindu egiten dituzte, poliki-poliki ezartzen diren arauak errespeta daitezen. Behaketatik abiatuta, planteamenduak birformulatzen dira, eta haur bakoitzak nola laguntzen duen baloratzen da, bere unearen arabera.
Haurren autonomiari esker, halaber, heldua norbaitek behar duenean egon daiteke, eta bestelako esku-hartze puntualak egin ditzake. Horrela, ikasleen aniztasuna errespeta dezakegu, eta hain aberatsak diren ingurune horietan gertatzen diren egoerei erantzun diezaiekegu. Aldi berean, irakasleak haur bakoitzaren ezagutza handia bereganatzen du, planteamendu horrek interakzioa errazten baitu eta lotura oso indartsuak sortzeko aukera ematen baitu.

Anbienteak eboluzionatuz eta egokituz doaz ikasturteak aurrera egin ahala, proposamen berriak egiten dira, betiere ikasleen interesei eta beharrei erantzunez. Horregatik, anbienteetan lan egiteak antolaketa handia eskatzen du, eta kalitatezko materialen bilaketa etengabea.

2018-2019 ikasturtean jarri zen martxan Mugimendu Autonomoa Zaldibiako Lardizabal Eskolako Haur Hezkuntzan, (HH3tik HH5era). Lehen Hezkuntzako 1. zikloan ere astean 7 ordutan, goizetan, mugimendu autonomoa egiten hasi zen, HHtik LHrako zubi bezala.

Mugimendu Autonomoa gela bakoitzan anbiente edo giro ezberdina bat izaten da. Ikasleak aukeratzen du zein geletan egon eta gela horretan zertan aritu.

2020-2021 ikasturtean, COVID19ak eragindako egoeraren ondorioz, ikasle talde bakoitzak bere gelan egon zen. Gela barruan antolatu ziren anbiente edo txoko ezberdinak, eta gela barruan egin zen mugimendu autonomoa, beste gelatakoekin nahastu gabe.

2021-2022 ikasturtean HHn berriro ere hasierako antolaketara itzultzeko ahalegina egin zen. LH 1-2-3n burbuilak mantenduz 5 talde egin ziren eta astean bost ordutan tailer ezberdinetatik pasatzen ziren ikasleak.

2022-2023 ikasturtean HHn Mugimendu Autonomoa egin zen, hasierako urteetan bezala. LH 1-2-3 EKOSISTEMAK deituriko antolaketa egiten hasi zen gela bakoitza giro bat eta bere barrena Habitat edo txoko ezberdinak sortuz. Ikasle taldeak tutorearekin batera mugitzen dira gela batetik bestea, aurrez antolatutako ordutegi baten arabera. LHko antolaketa hau Ondarruko Zaldupe eskolako esperientzian oinarritzen da.

2023-2024 ikasturtean HHn Mugimendu Autonomoa egingo da eta LH 1-2-3-4-ean EKOSISTEMAK -HABITATAK (gela bakoitzaren barruan gune ezberdinak) eta ikasle taldea bere irakaslearekin aldatzen da gela batetik bestera, landu behar dutenaren arabera.